Col 3 | KYG | STEP | Goti'a Kalaisi'e'mo magokepi alino he tino lapate'niya'mofe'mo koku'napi hane'niya yafe'mo lapa'ye hu'ninagetapa kahauya hiyo. Anile'mo Kalaisi'a Goti lamaga haopale'mo sia'ale'mo ne'maiye.

Colossians 3

1 Goti'a Kalaisi'e'mo magokepi alino he tino lapate'niya'mofe'mo koku'napi hane'niya yafe'mo lapa'ye hu'ninagetapa kahauya hiyo. Anile'mo Kalaisi'a Goti lamaga haopale'mo sia'ale'mo ne'maiye. 2 Ma mopafi yafe'mo lapakesamo o'afitapa muga anaga kotegamo nehaneya yafeke'mo lapakesamo afiyo. 3 Lapakaemo fali'nageno afa'a ne'maiya ya'mo alino fala kino ate'nigeno Kalaisi'e'mo magokepi lokaeno Gotipi'mo nehaneya'mofe'mae. 4 Kalaisi'a afa'a ne'mauna ya'mo aepa vekamo afole aisigetapae'mo ha le konali ya'amo agae'e'mo alisage'a lapakegae.

5 Aligaya'mofe'mo ma mopafi amega lapakufamo'mo nehaya kava'mo amagita falita ataleyo. Kumai kavanagi o'ani'ya kavanagi hosu lapaipa nekaliya kavanagi hosu kavafe'mo lapaka neteya kavanagi ma mopafi yafe'mo lapa'ye nehiya kavanagi hutapa alita amagitapa falita ataleyo. Ma mopafi yafe'mo hapa'ye nehisiya vaya'mogi aigofe gotife'mo mono nehae. 6 Goti ge'amo akame nosaya vaya'mogi ani agufa kava'mo nehaya'mofe'mo aipamo leno ne'apateyanageno kayo'mo apamigiye. 7 Hogotetapa ani agufa hosu kate'mo ne'utapae'mo hosu kavapi'mo mai'naya'monanafa 8 hemenimo muki mani agufa hosu kava'mo ago ataleyo. Lapaipamo olege lapai vaitapa o'apatege hanageke ya'mo alita o'apamige huta faipa huta o'apatege hosu kigi yokalo gemo osuge lapa'ye hisiya kava'mo alino afole aino atesiya agufa gemo osuge hutapa maiyo. 9 Lapakaemo atafa vekatapimo atalege atafa vekatapimo'a nehiya kava'mo atalege hutetapa saufa vekatapimo alita vai'naya'mofe'mo konagatapie'mo aigofe gemo osiyo. Goti'a saufa vekatapimo alo hu'niyanageno Goti'mo ageta aeto nehutapae'mo agaekana hutapa maisayafe'mo saufa vekatapimo mago'e mago'e huno alo huno nelapate. 11 Nelapateya'mofe'mo saufa vaya'mo mai'netapae'mo Yu nofi vayapati'mo o'mai'naya vayanagi Yu nofi vayapati'mo mai'naya vayanagi apakufamo olagau'naya vayanagi apakufamo lagau'naya vayanagi alu apake ne'aiya vayanagi kahaufilaga vayanagi kalavusi ali'ya'mo ne'aliya vayanagi afa'a ne'maiya vayanagi hu'a hailami salami hu'a no'maifa Kalaisi'a agai'age'mo muki kava'mo aepa ne'mo mai'neno'ae'mo muki alu vaya alu vaya'ai apaipafi'mo ne'maiye.

12 Goti'a lapakaefe'mo hau ayamopafi'mo hau'nigeno ago lekana paino lapateteno lapavaleno alino lapaote lapate'niya'mofe'mo lapau huta apatege alitapa lapao ya'mo huge ina agufa vaya'mo mai'none, hutapa lapakesamo afige yagu yaga kava'mo hutapa apatege lapakaetegamo hosu kava'mo nehisagetapae'mo afa'a mai'netapa falu fala lapaipamo kalita apatege hutapa maiyo. 13 Hosu kava'mo lapakaepati'mo hisagetapae'mo konagatapilegamo afalu afalu kava'mo hutapa vase kava'mo huge hosu kava'apimo alita atalege hutapa magokepi'mo lokaetapa maiyo. Mago konagatapimo'a konaga'ae'mo, nagaetegamo hosu kava'mo hu'niye, huno agesamo afi'nisiya'mo'mo Ala kava ne'mo'a hosu kavatapimo alino atale'niya kava hutapa hosu kava'amo alita ataleyo. 14 Mani kava'mo nehutapae'mohogote kava'mo hutapa lapau lapayamopafi'mo lapainageno'ao alagepa huno magokepi alino lokaeno lapateno. 15 Goti'a lapaipamo alino falu huno lapate'niya kava'mo'a lapaipale'mo yagaino lapateno. Goti'a magoke vaya'mo maisageno lapaipamo'mo falu hisiyafe'mo keya aeno ge hu'niye. Ani kava hutapa mai'netapae'mo Gotife'mo hao ke heyo. 16 Lapaipamo alo higeno'ao Kalaisife'mo ava gemo'a lapaipafi'mo mago'e huno hanege hanege huno alagi haneno. Alagepa huta lapakesamo afi'netapae'mo konagatapimo afalu afalu kava'mo hutapa alita apaya maletapae'mo hosu kava'mo osisayafe'mo ehetapiye, huta hapa paiyo. Lapaipafi'mo Gotife'mo hao ke nehetapae'mo samu yokemo huge mono yokemo huge Ala kava ne'mo agi'ale'mo ali'a ne'asagaya yokemo huge hutapa maiyo. 17 Muki agufa kava'mo huge muki agufa gemo huge nehisayana Ala kava ne'mo Yesu agi'alefe'mo hutetapa agaeteti'mo afotimo Gotife'mo hao ke heta maiyo.

Afamo anaga'mogimo hisaya kavafe'mo hu'niya gemae.

18 A'nemogitapae, hu'na, Ala kava nepi'mo mai'nisaya a'nemogimo hisaya kava hutapa anautapimogi apaiyafi'mo mai'netapa ge'apimo afiyo. 19 Anau'apimogitapae, hu'na, a'netapilegamo lokiya kava'mo osutapa apakaefe'mo lapau lapayamopafi'mo lapaino. 20 Mafa'nemogitapae, hu'na, muki kavatefe'mo itatapi afotapimogi ge'apimo ne'afisageno'ae'mo Ala kava ne'mo'a lusi kava huno amuse huno lapategaiya'mofe'mo ani kava'mo hiyo. 21 Afo'apimogitapae, hu'na, mafa'netapimogimo apaipamo lesiya agufa kava'mo osiyo fiku yanageno apaipamo'mo kana hugiyanagi. 22 Ali'ya ne'aliya vaya'mogitapae, hu'na, hosu kavanagetapa ali'ya aepa vaya'mogi amuse hu'a lapatesayafe'mo apaulagale'mo mai'netapaeke'mo ge'apimo ne'afiye. Gotife'mo koli nehutapae'mo muki afina'mo lapaipafati'mo ge'apimo afiyo. 23 Muki alu ali'ya alu ali'ya'mo ne'alitapae'mo vaya'aitefe'mo ali'ya'mo no'alufa Ala kava netefe'mo mani ali'ya'mo ne'aluve, huta lapayamukiki hutapa ali'ya'mo aliyo. 24 Ala kava ne'mo Kalaisi ali'ya'ale'mo mai'naya'mofe'mo ago afi'nayana Ala kava ne'mo'a alo hu male'niya yapati'mo miyatapimo alino lapamigiye. 25 Goti'a hosu kava'mo nehisaya vaya'mo agai'a aulagale'mo haiya vaya'mo mai'nafi huno agesamo o'afigifa anona'apilefe'mo hosu miya'apimo alino apamigiye. Goti'a muki vaya'aina magoke agufa kavateti'mo alino fako huno ne'apate.